د ننګرهار پوهنتون مشرتابه ددې پوهنتون د اقتصاد پوهنځي لیدنه او ارزونه وکړه.
د ننګرهار پوهنتون رئیس د خپلو مرستیالانو په ملتیا د پوهنځیو د ارزونې په لړ کې د اقتصاد پوهنځي څخه لیدنه وکړه او د یاد پوهنځي د فعالیتونو او پرمختګونو جاج یې واخیست.
د لیدنې پر مهال د اقتصاد پوهنځي رئیس پوهنمل محمد صادق رهنما د یاد پوهنځي د ټولو استادانو، آمرینو او مدیرانو په حضور کې د پوهنتون رهبرۍ ته د پوهنځي د فعالیتونو، لاسته راوړنو او نورو موضوعاتو په اړه پریزنټېش وړاندې کړ.
ښاغلي رهنما د پوهنتون له رهبرۍ مننه وکړه، چې هر کله یې د اقتصاد پوهنځي د ستونزو حل او ورته د امکاناتو برابرولو په برخه کې هلې ځلې ترسره کړي او د پوهنتون رهبرۍ ته یې د پوهنځي د تاریخچې، تشکیل، لاسته راوړنو، علمي برنامو، فرصتونو، ننګونو، ستونزو، اړتیاوو اوراتلونکو پلانونو په اړه د معلوماتو ورکولو سربېره هغوی سره خپلې غوښتنې او وړاندیزونه هم شریک کړل.
نوموړي د اقتصاد پوهنځي له ودانۍ څخه سالمه استفاده، د استادانو له لوري د علمي څېړنو ترسره کول او خپرول، د ماسترۍ برنامې په معیاري شکل جاري ساتنه، د تدریسي نصاب پوره کول، عملي کارونو ته د محصلینو معرفي کول، د محصلینو د علمي پرمختګ په موخه د(PDC) مرکز پرانیسته او تضمین کیفیت کې لوړې نومرې اخیستل د یاد پوهنځي لاسته راوړنې وبللې او همدارنګه یې د انټرنیټي اسانتیاوو نه شتون، اداري او خدماتي کارکوونکو کمښت، تدارکاتي پروسه کې ځنډ، د څانګو په کچه د تکنالوژیکي وسایلو او په ملي ژبه د تدریسي کتابونو کم والی او نورو پوهنتونونو سره د علمي توامیتونو نه شتون د یاد پوهنځي د پرمختګ پر وړاندې پراته خنډونه یاد کړل.
د ننګرهار پوهنتون رئیس شیخ انعام الله مدني د خپلو خبرو پر مهال د اقتصاد پوهنځي د علمي او اداري چارو ستاینه وکړه او د پوهنتون او پوهنځیو پرمختګ یې د علمي کادرونو او فعال اداري پرسونل د ګډو هڅو پایله وبلله.
نوموړي وویل: د پوهنتون مرستیالانو سره په ګډه یې د پوهنځیو او څانګو د چارو ارزونه پیل کړې، چې موخه ترېنه د ستونزو تشخیص او له منځه وړل دي.
د پوهنتون رئیس د یاد پوهنځي د علمي، تدریسي او اداري چارو د ښه والي په پار د ځینو لارښوونو تر څنګ ژمنه وکړه، چې د ټولو پوهنځیو پرمختګ لپاره به لازمې منابع برابرې کړي.
د ننګرهار پوهنتون د علمي چارو مرستیال پوهندوی مولوي احسان الله ناصح، د مالي او اداري چارو مرستیال پوهنیار قاضي خالد صداقت او د محصلانو چارو مرستیال پوهنیار حافظ سید محمد قاسم هاشمي نور ویناوال وو، چې د څېړنیزو فعالیتونو، اداري او تدریسي چارو پیاوړتیا او محصلینو ته د عملي کارونو لمن پراخولو اړوند یې لارښوونې وکړې او زیاته یې کړه، چې استادان باید د نړیوالو مقالو د لیکلو او نشر برخې ته پاملرنه زیاته کړي او د چارو بهبود په موخه د پوهنځیو تر منځ سالمه سیالي موجوده وي.
د مجلس په پای کې د پوهنتون رهبرۍ د پوهنځي له بېلابېلو برخو او څانګو لیدنه وکړه او د هغوی چارې یې وارزولې.
سرچینه : د عامه اړیکو، اطلاعاتو او نشراتو آمریت
