د ننګرهار پوهنتون محصلینو ته (د ږیرې پرېښودلو ګټې او خریلو وعیدات) تر عنوان لاندې دیني او معلوماتي سيمینار وړاندې شو.
د ننګرهار پوهنتون د دعوت او ارشاد امریت له خوا د لیلیې په جامع مسجد کې تېره ورځ د ماښام لمانځه څخه وروسته سلګونو تنو محصلینو ته د ږیرې پرېښودلو حکم، اهمیت، فضایلو او ګټو تر څنګ د خریلو او کمولو وعیداتو په هکله دیني ـ معلوماتي سيمینار وړاندې شو.
د ننګرهار پوهنتون د دعوت او ارشاد آمر مولوي اعجازالحق زَلِف د موضوع ارایې پر مهال د اسلام له نظره د ږیرې د پرېښودلو اهمیت، مقام، فضیلت او ټولنیزې ګټې تشریح کړې او ویې ویل، چې ږیره یو مهم نبوي سنت دی، چې د اسلامي هویت څرګندونه کوي او د مسلمان په ظاهري او باطني شخصیت جوړونه کې مهم رول لري.
نوموړي همدارنګه د ږیرې خریلو او کمولو په هکله د اسلام مبارک دین وعیدات او نبوي سنتو مخالفت کوونکو ته ټاکل شوي عقوبات بیان کړل او زیاته یې کړه، چې د نبوي سنتو پیروي او اسلامي ارزښتونو ساتنه د انساني شخصیت جوړونې او اخلاقي پرمختګ سبب ګرځي او اړینه ده، چې محصلین په خپل ورځني ژوند کې د شریعت احکامو ته ځانګړې پاملرنه وکړي.
د سيمینار په پای کې د ننګرهار پوهنتون د لیلیو عمومي مدیر مولوي عبدالحکیم حقاني محصلینو ته وینا وکړه او هغوی ته یې د لیلیې نظم، پاکوالي او بشپړه توګه د ټاکلو اصولو پلي کولو اړوند خبرې او سپارښتنې وکړې.
سیمینار په دعا سره پای ته ورسېد.
سرچینه: د اطلاعاتو، نشراتو او عامه اړیکو امریت
