ننګرهار پوهنتون ژبو او ادبیاتو پوهنځي کې د عربي ژبې او ادب څانګې دوکتورا برنامه پیل شوه.
ننګرهار پوهنتون ژبو او ادبیاتو پوهنځي عربي ژبې او ادب څانګه کې د دوکتورا برنامه رسماً پرانیستل شوه، چې په همدې موخه جوړو شویو مراسمو کې د ننګرهار پوهنتون رئیس، مرستیالانو، د پوهنځي رهبرۍ، استادانو او د برنامې سکالرانو برخه اخیستې وه.
غونډې ته د ښه راغلاست وینا پر مهال د ژبو او ادبیاتو پوهنځي رئیس پوهنیار حافظ سید محمد قاسم هاشمي وویل، په عربي ژبې او ادب څانګه کې د دوکتورا برنامې پیلېدل د پوهنتون لپاره لویه لاسته راوړنه ده، د لوړو زده کړو پرمختګ لپاره یې د ماسترۍ او دوکتورا برنامو پراختیا یو بنسټیز اصل وباله او د یادې برنامې ایجاد کې یې د ټولو مسؤلینو له هڅو د مننې ترڅنګ ژمنه وکړه، چې د عربي ژبې او ادب په برخه کې به داسې مسلکي او متعهد کادرونه وروزي، چې د علم، تحقیق او تدریس ډګر به ورسره لا زیات پیاوړی شي.
د ننګرهار پوهنتون رئیس شیخ انعام الله مدني غونډې ته په خپله وینا کې د عربي ژبې په ارزښت خبرې وکړې او ویې ویل، عربي ژبه د قرآن کریم، اسلامي تمدن او علومو ژبه ده، چې په هکله یې ژوره پوهه د اسلامي میراث د سم درک زمینه برابروي.
نوموړي زیاته کړه، چې د یادې برنامې ایجاد سره به د عربي ژبې او ادب څانګې علمي او څېړنیز بهیر لا پیاوړی، منظم او پراخ شي او سپارښتنه یې وکړه، چې مسؤلین او استادان دې د یادې برنامې بریالیتوب لپاره په اخلاص کار وکړي.
د ننګرهار پوهنتون د علمي چارو مرستیال پوهنمل دوکتور قدرت الله عمرخېل، د فوق لیسانس برنامو آمر پوهنوال دوکتور نجیب الله صالح او د عربي دوکتورا برنامې مسؤل پوهاند دوکتور عبدالحی مقیم د غونډې نور وینا وال وو، چې د یادې برنامې د جوړښت، ماهیت، د فوق لیسانس برنامو معیاري کېدو او لا پیاوړتیا او په پوهنتون کې د تدریس او تحقیقاتو کیفیت ته زیاتې پاملرنې په هکله ویناوې وکړې او خپلې مشورې او وړاندیزونه یې شریک کړل.
د یادونې وړ ده، چې د عربي ژبې او ادب دوکتورا برنامه په خپله لومړۍ دوره کې یو ټولګی لري او ۱۲ تنه سکالران په کې زده کړې ترسره کوي.
سرچینه: د اطلاعاتو، نشراتو او عامه اړیکو امریت
