د وړ او په کار پوه مسلکي کادرونو د روزنې لپاره اړینه ده، چې معیاري او د ټولنې غوښتنو ته ځواب ویونکی نصاب او کریکولم ولرو.
د یادې موخې د ترلاسه کولو لپاره د پوهنتون محترم استادان باید د نصاب د معیاري کېدا لپاره هلې ځلې وکړي، وخت په وخت نوي مسایل په کریکولم کې ځای پر ځای او د تیوري تر څنګ د محصلینو عملي زده کړو ته هم ځانګړې پاملرنه وکړي.
یادې خبرې د ننګرهار پوهنتون رئیس پوهاند دوکتور خلیل احمد بهسودوال د نصاب کمېټې غړو ته په هغه مشورتي ناسته کې وکړې، چې د نصاب او کریکولم د بیا کتنې او اصلاح په اړه جوړه شوې وه.
نوموړي وویل: د نصاب او کریکولم اصلاح او معیاري کېدل د پوهنتون د ادارې لومړیتوب دی او په دې برخه کې باید د پوهنتون او پوهنځیو د کریکولم کمېټو غړي او نور مسؤل اشخاص کوټلي ګامونه واخلي.
د پوهنتون رئیس زیاته کړه، چې د څانګو له خوا باید مضامین تغیر او استادان یې هم وخت په وخت بدل شي او د تیوري تر څنګ د محصلینو عملي زده کړو ته هم ځانګړې پاملرنه وشي.
پوهاند بهسودوال د پوهنتون د نصاب د مرکزي کمېټې غړو د کړنو ستاینه وکړه او زیاته یې کړه، چې د یادې برخې د لا زیاتې غنا او معیاري کېدو لپاره نورې هلې ځلې هم وکړي.
د ننګرهار پوهنتون د علمي چارو مرستیال پوهندوی دوکتور محمد حامد کډوال او د محصلانو چارو مرستیال پوهنوال سید اکرم هاشمي د نصاب د معیاري کېدو په اړه خپلې سپارښتنې د کمېټې له غړو سره شریکې کړې او دغه راز یې غوښتنه وکړه، چې د پوهنځیو مسؤلین دې د محصلینو د عملي زده کړو په برخه کې د بېلابېلو ادارو سره شته تفاهملیکونو تعقیب او عملي کړي.
د ننګرهار پوهنتون د نصاب کمېټې مشر پوهنمل هجرت الله صافي د پوهنتون د مشرتابه مننه وکړه، چې د کریکولم د اصلاح په برخه کې د دوی ملاتړ کوي او زیاته یې کړه، چې د پوهنځیو د کریکولم د معیاري کېدو لپاره یې د بیاکتنې او ارزونې مهال وېش جوړ کړی، چې په وینا یې، د کمېټې د غړو په ملتیا به ډېر ژر یاده چاره بیاځلي پیل کړي.
