د ننګرهار پوهنتون د الکترونیکي زده کړو کمېټې نوبتي غونډه وکړه.
د ننګرهار پوهنتون د الکترونیکي زده کړو کمېټې د دې پوهنتون د علمي چارو مرستیال په مشرۍ غونډه وکړه، چې پر مهال یې لوړو زده کړو وزارت څخه د تائید شویو کورسونو معیاري ثبت، ثبت بهیر څخه منظمې څارنې، اړونده برخه کې د استادانو مسلکي پیاوړتیا، د ثبت لازمو وسایلو او امکاناتو برابرولو او یو شمېر متفرقه مسایلو اړوند خبرې او نظریات شریک شول.
د ننګرهار پوهنتون د علمي چارو مرستیال پوهنوال مولوي احسان الله ناصح په خپله وینا کې د کورسونو معیاري ثبت او د الکترونیکي زده کړو کمېټې فعالیتونو په اهمیت وغږېد او د کورسونو د ثبت مربوط هر راز ستونزو ژر حل، د ریکارډ وسایلو اغېزناکې کارونې او د استادانو په ظرفیت لوړولو باندې یې ټینګار وکړ.
د علمي چارو مرستیال همدا راز محصلینو لپاره په تدریسي بهیر کې د عصري ټکنالوژۍ استعمال، د زده کړې انلاین طریقو او معلوماتي سایټونو د ښودلو اړتیا یاده کړه او سپارښتنه یې وکړه، چې استادان باید یادې چارې ته زیاته پاملرنه وکړي.
د مجلس پر مهال د الکترونیکي زده کړو کمېټې مشر پوهنیار عارف الله ضیاء د انلاین کورسونو ثبت په موخه استادانو ته د لوړو زده کړو محترم وزارت له خوا جوړ شوي ورکشاپ کې د ګډون جزیات او راپور شریک کړ او دغه راز یې د کورسونو ثبت اړوند علمي او تخنیکي معلومات وړاندې کړل.
د غونډې پر مهال د ننګرهار پوهنتون استادانو ته اړونده برخه کې د مسلکي روزنې او معلومات زیاتوالي په موخه د یو ورکشاپ په جوړولو هوکړه وشوه.
