ننګرهار پوهنتون کې د لاسونو وینځلو سیستم جوړېدو چارې پیل شوې.
یاد سیستم، چې دست شويۍ، د اوبو ذخیره، سولري برق، واټر پمپ او نور ملحقات لري، د NRC ادارې د اوبو رسولو او حفظ الصحې پروژې په مالي مرسته په عصري بڼه جوړېږي، چې چارې به یې په راتلونکو شلو ورځو کې بشپړې شي.
د یادو رغنیزو چارو د بنسټ ډبره د ننګرهار پوهنتون رئیس پوهاند دوکتور خلیل احمد بهسودوال، د لوړو زده کړو وزارت فوق العاده استازي او د اداري او مالي چارو مرستیال قاضي خالد صداقت، د محصلانو چارو مرستیال پوهنوال سید اکرم هاشمي او د NRC ادارې د اوبو رسولو او حفظ الصحې پروژې مسؤل انجنیر فرهاد عاقب له خوا کېښودل شوه.
پوهاند بهسودوال د خپلو خبرو پر مهال د NRC ادارې مننه وکړه، چې د یاد سیستم د جوړولو تابیا یې وکړه او زیاته یې کړه، چې د نوموړي سیستم څخه به د محصلینو او مراجعینو د حفظ الصحې تر څنګ د پوهنتون د جامع مسجد لمونځ کوونکي د اودسونو لپاره ګټه واخلي.
