د ننګرهار پوهنتون او خصوصي پوهنتونونو علمي کادر غړو ته (د څېړنیزې ستونزې پېژندنه او عنوان ټاکنه) تر سرلیک لاندې یو ورځنی ورکشاپ دایر شو.
یاد ورکشاپ چې د علمي څېړنو معاونیت په نوښت او د مسلکي زده کړو پرمختیايي مرکز په کوربتوب د ننګرهار پوهنتون د غونډو په تالار کې ترسره شو، د دې پوهنتون د ۱۴ ګونو پوهنځیو او خصوصي پوهنتونونو لسګونو تنو علمي کادرونو په کې ګډون کړی و.
د ورکشاپ پرانیستې وینا پر مهال د ننګرهار پوهنتون د علمي څېړنو مرستیال پوهندوی دوکتور سعید محمد وقار د ورکشاپ پر اهمیت خبرې وکړې، د استادانو له فعال ګډون څخه یې مننه وکړه او د څېړنیزې ستونزې د سمې پېژندنې او د علمي عنوان د دقیقې ټاکنې پر ارزښت یې هر اړخیز معلومات وړاندې کړل.
نوموړي زیاته کړه، څېړنه له عنوانه نه، بلکې له ستونزې پیلېږي او که ستونزه په سمه توګه تعریف شي، نو د څېړنې پوښتنې، فرضیې، موخې، میتودولوژي او حتی احصایوي تحلیل هم په سمه توګه ټاکل کېږي.
د علمي څېړنو مرستیال همدارنګه د ښه څېړونکي په ځانګړتیاوو خبرې وکړې او ویې ویل، ښه څېړونکی هغه دی چې یوه واقعي ستونزه وپېژني، د هغې لپاره علمي شواهد ومومي او داسې حل وړاندې کړي، چې د علم او ټولنې لپاره ارزښتناک وي.
د ورکشاپ په دویمه برخه کې د ننګرهار پوهنتون د علمي څېړنو آمر پوهنمل دوکتور حکیم خان حقیار د موضوع اړوند ازاد علمي بحث وکړ او ورپسې یې د پريزنټېشن له لارې د څېړنیزې ستونزې د پېژندنې، ریسرچ ګیپس د موندنې او د مناسب علمي عنوان د ټاکنې اړوند مهم مطالب او معلومات ګډونوالو ته وړاندې کړل.
په پای کې د ګډونوالو استادانو پوښتنې هم ځواب شوې او ورکشاپ د ننګرهار پوهنتون د استادانو چارو آمر مولوي محمد طارق مخلص په دعا سره پای ته ورسېد.
سرچینه: د نشراتو او عامه اړیکو امریت
