ننګرهار پوهنتون کې د ښکلا او سرسبزۍ چارې په چټکۍ سره روانې دي.
یادې چارې، چې ددې پوهنتون د مشرتابه د لارښوونې او د پوهنتون د اداري او مالي چارو مرستیال تر مستقیمې څارنې لاندې د پوهنتون د اداري او خدماتي کارکوونکو له خوا جریان لري، په بشپړېدو سره به یې د پوهنتون په فزیکي بڼه کې مثبت تغیر او ښکلا رامنځته شي.
د دغو چارو پر مهال د پوهنتون مخې ته د یو کیلو متر په اندازه د ګلدان پاکوالي سربېره د پوهنتون دننه بېلابېلو ساحو کې د چمنونو، ونو او بوټو اضافي برخې اصلاح او زینتي بوټي وکرل شول.
د ننګرهار پوهنتون د اداري او مالي چارو مرستیال پوهنیار قاضي خالد صداقت وویل: له یادو چارو څخه یې موخه محصلینو ته د زده کړو او مامورینو ته د کار لپاره د یو مناسب چاپېریال رامنځته کول دي.
ښاغلي صداقت له ټولو کارکوونکو مننه وکړه، چې د پوهنتون د ښکلا او سمسورتیا لپاره هلې ځلې کوي.
نوموړي زیاته کړه، هڅه کوي په پوهنتون کې د ټولو ورانو او ویجاړو ځایونو د رغاونې تر څنګ په څلور لارو کې داسې څلي جوړ کړي، چې خلکو ته دیني، تاریخي، کلتوري او علمي پیغامونه وړاندې کړي.
سرچینه: د عامه اړیکو، اطلاعاتو او نشراتو آمریت
