د ننګرهار پوهنتون ممتاز محصلین د یوې سترې غونډې په ترڅ کې وستایل شول.
ننګرهار پوهنتون د خپلو اړوندو پوهنځیو (۴۲) تنه هغه محصلین، چې د تېر سمستر په نهايي ازموینو کې یې د لوړو نمرو په اخیستلو سره د پوهنتون او خپلو پوهنځیو په کچه لوړ مقامونه ترلاسه کړي وو، د یوې سترې غونډې په ترڅ کې وستایل.
په همدې مناسبت د محصلانو خدمتونو او همغږۍ امریت له خوا د پوهنتون د غونډو تالار کې ستاینغونډه جوړه شوې وه، چې د پوهنتون رئیس، محصلانو چارو مرستیال، پوهنځیو مسؤلینو، استادانو، اداري آمرینو او ګڼ شمېر محصلینو په کې برخه لرله.
د غونډې د پرانیستې وینا پر مهال د ننګرهار پوهنتون رئیس شیخ انعام الله مدني ممتازو محصلینو ته مبارکي وویله او زیاته یې کړه، هغه ځوانان چې د زیار او استقامت پر مټ لوړو مقامونو ته رسېږي او د علمي لاسته راوړنو لپاره شپه او ورځ هڅې کوي باید وستایل شي، څو د نورو لپاره د تشویق سبب وګرځي.
د نوموړي په وینا د پوهنتون اداره او استادان هڅه کوي، چې محصلینو ته د تدریس او عملي زده کړو ښې او معیاري اسانتیاوې برابرې کړي، چې له نېکه مرغه د همدې هلو ځلو پایله ده، چې زمونږ محصلینو د پوهنتون دننه او بهر ښې لاسته راوړنې لرلي او په ګڼو سیالیو او ازموینو کې یې خپلې وړتیاوې ښودلي.
محترم شیخ صاحب وویل، د محصل لپاره د مسلکي پوهې تر څنګ حمیده اخلاق لازمي دي او هغوی ته یې سپارښتنه وکړه، چې په خپلو استعدادونو لا ډېر کار وکړي او د هېواد خدمت او پرمختګ لپاره ځانونه ښه وروزي.
د ممتازو محصلینو په استازیتوب د انجنیري پوهنځي محصل محمد فهیم ستانکزي خبرې وکړې او خپلې بریاوې یې د استادانو د لارښوونو، هڅو او کورنۍ ملاتړ پایله وبلله او د ستاینغونډې جوړېدو له کبله یې د پوهنتون رهبرۍ او نورو مسؤلینو څخه مننه وکړه.
د غونډې په پای کې د پوهنتون رئیس د پوهنتون په کچه لومړي، دویم او درېیم مقام ګټونکو محصلینو ته نغدي ډالۍ ورکړې او پاتې نورو محصلینو ته د بېلابېلو پوهنځیو مسؤلینو له خوا ستاینلیکونه ورکړل شول.
سرچینه: د اطلاعاتو، نشراتو او عامه اړیکو امریت
