د ننګرهار پوهنتون علمي شورا نوبتي غونډه وکړه.
یاده کاري ناسته، چې نن د اسد میاشتې په ۱۲ مه نېټه د پوهنتون رئیس، علمي چارو، څېړنو او علمي مجلو او اداري او مالي چارو مرستیالانو، پوهنځیو او تدریسي روغتون رئیسانو، استادانو او یو شمېر اداري آمرینو په ګډون سره د پوهنتون په ریاست مقام کې ترسره شوه، پر مهال یې د علمي او تدریسي چارو ښه والي، لا زیات اکاډمیک پرمختګ رامنځ ته کېدو، استادانو علمي ترفیعاتو کیسونو او يو شمېر نورو موضوعاتو په اړه بحثونه او پرېکړې وشوې.
د ننګرهار پوهنتون رئیس شیخ انعام الله مدني په پیلیزه وینا کې د ټولو پوهنځیو نصاب بیاکتنې او اصلاح باندې ټینګار وکړ، په همدې اړه یې د لوړو زده کړو وزارت محترم مشرتابه سپارښتنې د شورا له غړو سره شریکې کړې او لارښوونه یې وکړه، چې ټول پوهنځي دې د خپل نصاب دقیقه ارزونه او بیاکتنه وکړي او یاده برخه کې دې خپل وړاندیزونه مسؤلې کمېټې ته وسپاري.
نوموړي زیاته کړه، چې د تدریسي بهیر کیفیت ښه والي او علمي پرمختګ تضمین لپاره دې استادانو او محصلینو ته دیني او علمي برنامې جوړې او د محصلینو فکري سلامتيا او عقیدوي ثبات ته دې زیاته پاملرنه وشي.
د غونډې پر مهال د ننګرهار پوهنتون د علمي چارو مرستیال پوهنوال مولوي احسان الله ناصح د خپلو ترسره کړیو میاشتنیو علمي چارو، لاسته راوړنو او د پوهنتون منسوبینو ته د ناسمو رواجونو او عقودو هکله د عالیقدر امیرالمؤمنین حفظه الله د فرمانونو تشریح په موخه د جوړ شوي سيمینار راپور شریک کړ.
نوموړي مسؤلینو ته د عالیقدر امیرالمؤمنین حفظه الله د فرامینو په تړاو ترسره کېدونکي کنفرانس ته د مقالو لیکلو، استولو او د پروګرام دوره يي بیاکتنې اړوند یو شمېر برخو کې د پوهنځیو مسؤلینو ته لارښوونې او سپارښتنې وکړې.
د مجلس په وروستۍ برخه کې د ننګرهار، کونړ سید جمال الدین افغاني، لغمان او لوګر پوهنتونونو د استادانو د علمي ترفیعاتو ۱۷ کیسونو مطرح کولو تر څنګ په یو لړ متفرقه مسایلو بحثونه او په اړه یې لازمې پرېکړې وشوې.
