د ننګرهار پوهنتون مرکزي کمپس د سمسورتیا او سرسبزۍ پلان جوړ او د پوهنتون مشرتابه ته وسپارل شو.
یاد پلان د ننګرهار پوهنتون د تنظیف، ښکلا او سمسورتیا کمېټې په نوښت د کرنې پوهنځي د استادانو له خوا جوړ او د تطبیق په موخه د ننګرهار پوهنتون رئیس ته وسپارل شو.
په همدې اړه د ننګرهار پوهنتون ریاست مقام کې غونډه جوړه شوې وه، چې د پوهنتون د رئیس، مرستیالانو، د کرنې پوهنځي استادانو، د تنظیف او ښکلا کمېټې غړو، د تهیه، تدارکاتو، خدماتو او لیلیې مسؤلینو په کې برخه لرله.
د مجلس پر مهال د کرنې پوهنځي د استادانو له خوا د پوهنتون مشرتابه او اړوندو مسؤلینو ته د نوموړي پلان په اړه وضاحت او معلومات ورکړل شول، چې په کې د نویو زینتي، مېوه لرونکو او بې مېوې نیالګیو کېنولو لپاره مناسب ځایونه په نښه او همدا راز هغه ونې، چې وچې او یا بې ځایه ولاړې دي، لیرې او پر ځای یې نورې کېنول کېږي.
د پلان له مخې د پوهنتون مرکزي کمپس ټولې ۱۰۵۶۹ ونې لري، چې له دې ډلې ۲۴۵ ونې وچې شوي، چې د وچو ونو پر ځای او همدارنګه د پوهنتون په نورو بېلابېلو برخو کې ۷۰۷۱ نویو نیالګیو کېنولو ته اړتیا ده.
د ننګرهار پوهنتون رئیس پوهاند دوکتور خلیل احمد بهسودوال د کرنې پوهنځي د استادانو پوهندوی امین الله یوسفزي، پوهنمل دوکتور ګلبدین ګلاب او پوهنیار محمد غني راغب مننه وکړه، چې نوموړی پلان یې برابر کړ او د پوهنتون د حفظ او مراقبت او تنظیف او سمسورتیا کمېټې مسؤلینو ته یې د یاد پلان د تطبیق هدایت وکړ، چې د هغوی له خوا یې د اجرا ډاډ ورکړل شو.
