د ننګرهار پوهنتون منسوبینو څخه د امر بالمعروف او نهې عن المنکر قانون په اړه تقریري ازموینه واخیستل شوه.
د لوړو زده کړو محترم وزارت د دعوت او ارشاد ریاست د لارښوونې په اساس د ننګرهار پوهنتون د دعوت او ارشاد امریت مسؤلینو د دې پوهنتون د اړوندو پوهنځیو او تدریسي روغتون له استادانو او اداري کارکوونکو څخه د امر بالمعروف او نهې عن المنکر قانون کې تقریري ازموینه واخیسته.
یاده ازموینه چې د پوهنتون د عمومي رئیس دوکتور مفتي عبدالوارث بسام او مرستیالانو په نظارت کې ترسره شوه، درې ورځې یې دوام وکړ.
د مسؤلینو په وینا، د ازموینې موخه د یاد قانون د احکامو په اړه د پوهنتون د منسوبینو د پوهې کچې ارزول، د قانون د مادو په اړه د هغوی د معلوماتو زیاتوالی، په کاري چاپېریال او چارو کې د اړوندو لارښوونو کامل تطبیق او پوهاوي پیاوړتیا وه.
د ازموینې پر مهال له ګډونوالو څخه د یاد قانون بېلابېلو فصلونو او مادو په اړه پوښتنې وشوې، چې هغوی ورته د خپلې پوهې مطابق ځوابونه ورکړل.
د ننګرهار پوهنتون د دعوت او ارشاد آمر مولوي اعجازالحق زَلِف وویل، چې یاده ازموینه د ټاکل شوي طرزالعمل او لارښوونو په رڼا کې په شفاف، منظم او عادلانه ډول ترسره شوه.
نوموړي زیاته کړه، هڅه کوي چې د مشرتابه حفظه الله تعالی ورعاه او لوړو مقاماتو د فرامینو او لارښوونو له مخې خپلې چارې ترسره او د مربوطه احکامو په هکله د پوهنتون کارکوونکو سره لازم معلومات شریک کړي.
سرچینه: د نشراتو او عامه اړیکو امریت
