د ننګرهار پوهنتون استادانو، اداري کارکوونکو او محصلینو ته جوړ شوی ۴ ورځنی ديني او اصلاحي سيمینار پای ته ورسېد.
یاد سيمینار، چې د ننګرهار پوهنتون د دعوت او ارشاد امریت په نوښت څوارلس ګونو پوهنځیو ته جوړ شوی و، پر مهال یې د هېواد جیدو علماوو او افتخاري شیوخ کرامو له خوا د مختلفو دیني او اصلاحي موضوعاتو په هکله ویناوې او معلومات وړاندې شول.
د ننګرهار پوهنتون د دعوت او ارشاد آمر مولوي اعجازالحق َزلِف په وینا له دې سيمینار څخه یې موخه د استادانو، محصلینو او اداري کارکوونکو فکري روزنه، د پوهې کچه لوړول، د اسلامي احکامو اقامه، نبوي اخلاقو او طریقو تطبیق و.
د یاد سيمینار په ۴ ورځو کې د دوو تنو علماء کرامو شیخ الحدیث مولوي امیرالرحمن نعماني او مفتي شاهدالله حقاني له خوا د اسلامي عقیدې، ایمان، د ایمان څانګو، د عبادتونو د معنوي او تربیوي اغېزو، د لمانځه حکم، فضیلت او اسرارو اړوند بېلابېل علمي او ديني معلومات وړاندې شول.
سرچینه: د اطلاعاتو، نشراتو او عامه اړیکو امریت
