د ننګرهار پوهنتون محصلینو ته د ( کاري فرصتونو، کار بازار او استخدام پروسې ) په هکله معلوماتي او روزنیز سيمینار وړاندې شو.
د ننګرهار پوهنتون د څوارلس ګونو پوهنځيو د وروستیو کلونو سلګونو تنو محصلینو ته د پوهنتون د غونډو په عمومي تالار کې د عامه ادارې او پالیسۍ پوهنځي دوو تنو استادانو پوهندوی دوکتور ریحان الله رحیمي او پوهنمل منصور فقیرزي له خوا د کاري فرصتونو، کار بازار او استخدام پروسې په اړه معلوماتي او روزنیز سيمینار دایر شو.
په دې سیمینار کې، چې د ننګرهار پوهنتون محصلانو خدمتونو او همغږۍ امریت په نوښت جوړ شوی و، هغه مهم مسایل تشریح شول، چې د محصلینو د کار موندنې لپاره اړین وو او د هغوی پوهه ورسره لوړه شوه.
د موضوعاتو وړاندې کوونکو استادانو محصلینو ته د کار بازار پېژندنې، کار ډولونو، د کاري فرصت موندنې مهارت د زده کړې اغېزو، د کار ورکوونکو اساسي شرایطو، کارکوونکي وړتیاوو او خصوصیاتو په هکله په ساده او روښانه توګه معلومات ورکړل.
استادانو همدارنګه د استخدام د پروسې عملي مرحلې تشریح کړې، چې په کې د دندې موندلو لارې، د غوښتنلیک (اپلای) طریقه، د شاټ لېسټ شرایطو، د تحریري ازموینې بهیرڅرنګوالي، د مرکې مهمو ټکو او نورو اړینو مسایلو اړوند معلومات او جزیات محصلینو سره شریک کړل او د هغوی پوښتنې یې ځواب کړې.
