د ننګرهار پوهنتون طب پوهنځي محصلینو ته په خرګوش (سوۍ) د زرقیاتو د تطبیق او اغېزو معلومولو پروسه په عملي بڼه تشریح شوه.
یاده عملي چاره ددې پوهنځي استاد پوهاند سید قمبر علي حیدري په لارښوونه د فارمکولوژي څانګې د څلورم کال لومړي سمستر محصلینو لخوا ترسره شوه، چې پر مهال یې یو نارینه خرګوش (سوۍ) ته په بټوک عضله کې د انستېزیاوي دوایانو د تطبیق تخنیکونه او پروسیجر په عملي توګه وښودل شو.
له دې عملي تجربې څخه موخه د کټامین (Ketamine) په نوم انستېزیاوي دوا د کارولو طریقې زده کول او په حیواناتو کې یې د اغېزو مشاهده کول وو.
د دغه عملي کار په پایله کې، چې محصلینو د انستېزیا او زرق کولو ټول اصول او لارښوونې په سمه او منظمه توګه مراعت کړې، د یاد خرګوش سترګې خلاصې او بدن یې په عمومي توګه بې حسه شوی و.
د ننګرهار پوهنتون طب پوهنځي رئیس پوهنوال محمد عظیم عظيمي د استاد پوهاند قمبر علي حیدري او فارمکولوژي څانګې استادانو څخه مننه وکړه، چې محصلینو ته یې د یاد پروسیجر عملي تجربه کولو فرصت برابر کړ.
د یادونې وړ ده، چې تر دې وړاندې هم د طب پوهنځي محصلینو ته د استادانو له لوري د عملي زده کړو په لړ کې پر حیواناتو او انساني ماډلونو تجربې او کلینیکي تمرینونه ترسره شوي.
