د امام ابو حنیفه (رحمه الله) تخصصاتو دیني جامعې مسؤلینو د ننګرهار پوهنتون له مشرتابه سره غونډه وکړه.
ننګرهار پوهنتون کې د امام ابو حنیفه (رحمه الله) تخصصاتو دیني جامعې رئیس او اداري او مالي چارو مرستیال د ننګرهار پوهنتون مشرتابه غړو سره غونډه وکړه او دواړو لوریو د جهادي او خصوصي مدارسو د عالیې او عالمیې مرحلو د فاضلانو راتلونکې کلنۍ ازموینې په اړه خبرې او بحثونه وکړل.
د غونډې پر مهال د امام ابو حنیفه (رحمه الله) تخصصاتو دیني جامعې رئیس ابــوالاسد الشهيد مُفتي حـزب الله الــحقـاني او د یادې جامعې د اداري او مالي چارو مرستیال مفتي محمد حسن نعماني د ننګرهار پوهنتون رئیس شیخ انعام الله مدني، د علمي چارو مرستیال پوهندوی مولوي احسان الله ناصح، د محصلانو چارو مرستیال پوهنیار حافظ سید محمد قاسم هاشمي او د اداري او مالي چارو مرستیال مفتي نعمت الله اعزازي سره په خبرو کې د منظمې او شفافې ازموینې اخیستلو او فاضلانو ته د لازمو اسانتیاوو برابرولو په اړه مشورې او نظریات شریک کړل.
په یاد مجلس کې د دواړو نهادونو مسؤلینو له خوا د راتلونکې ازموینې د علمي، اداري او تخنیکي چارو پر وخت ترسراوي لپاره مدیره هیئت وټاکل شو.
په پای کې د ننګرهار پوهنتون او امام ابو حنیفه (رحمه الله) تخصصاتو دیني جامعې مشرانو راتلونکې کې د پیاوړو متقابلو همکاریو ترسره کولو ژمنه وکړه.
