د ننګرهار پوهنتون فرهنګي کمېټې غونډه وکړه.
د ننګرهار پوهنتون فرهنګي مرکزي کمېټې د دې کمېټې د مشر پوهندوی دوکتور همایون حامد په مشرۍ زراعت پوهنځي کې غونډه وکړه، چې پر مهال یې د پوهنتون او پوهنځیو په کچه په یو لړ فرهنګي او کلتوري مسایلو بحث او خبرې وشوې.
د یادې غونډې، چې په کې د ټولو پوهنځیو استازو ګډون کړی و، پیل کې د کمېټې مشر د خپلو کړنو، فعالیتونو او راتلونکو پلانونو په اړه د مجلس غړو ته معلومات ورکړل او هم یې د هغوی نظریات او وړاندیزونه واورېدل.
د مجلس په دویمه برخه کې د کمېټې د غړو له خوا د اجنډا مطابق د کمېټې تېرو کړنو ته کتنه وشوه، د پوهنځیو په کچه د جوړو شویو کمېټو د ترسره کړیو چارو راپورونه وغوښتل شول او نیمګړتیاوو او ستونزو ته حل لارې وموندل شوې.
د دیني، ملي او تقویمي ورځو نمانځل، د فرهنګي کمېټې د نوې لایحې ترتیب او د پوهنتون له علمي شورا څخه یې تائیدول، د پوهنتون په نوم د ساعتونو، جنتریو او نورو نشراتي توکو چاپول، محصلینو لپاره ډیټابیس جوړول، د فرهنګي کړنو د راپورونو او نورو اسنادو ترتیب، تنظیمول او محصلینو ته روزنیزې او ښوونیزې برنامې چمتو کول هغه څه وو، چې د مجلس پر مهال پرې هر اړخیزې خبرې او په اړه یې لازمې پرېکړې وشوې.
سرچینه : د عامه اړیکو، اطلاعاتو او نشراتو امریت
