د ننګرهار پوهنتون اقتصاد پوهنځي ماسترۍ برنامې څخه ۲۷ تنه فارغ شول.
د ننګرهار پوهنتون اقتصاد پوهنځي اداره او تجارت څانګې ماسترۍ برنامې (اېم بي ای) څخه په ۷ مه دوره کې (۲۷) تنه علمي او مسلکي کادرونه فارغ او د فراغت سندونه یې ترلاسه کړل.
په همدې مناسبت د ننګرهار پوهنتون د غونډو په تالار کې د فراغت مراسم جوړ شوي وو، چې د ننګرهار پوهنتون عمومي رئیس، د څېړنو او علمي مجلو مرستیال، ولایت مقام استازي، اقتصاد پوهنځي رهبرۍ او استادانو، د مختلفو پوهنځیو رئیسانو، د خصوصي پوهنتونونو مسؤلینو او د فارغانو د کورنیو غړو په کې ګډون کړی و.
د ننګرهار پوهنتون د اقتصاد پوهنځي رئیس پوهنمل محمد صادق رهنما د غونډې د ښه راغلاست وینا پر مهال فارغانو ته مبارکي وویله، د هغوی په علمي او مسلکي روزنه کې یې د استادانو له نه ستړې کېدونکو هلو ځلو مننه وکړه او زیاته یې کړه، چې د ماسترۍ تر کچې زدهکړې بشپړول او دې پړاو ته رسېدل د کلونو مسلکي هڅو او خواریو پایله ده.
نوموړي زیاته کړه، چې اقتصاد پوهنځی به راتلونکې کې هم د ملک اقتصادي او اړوندو سکټورونو د پیاوړتیا لپاره لوړ علمي ظرفیت لرونکي او مسلکي کادرونه وروزي او ټولنې ته به یې وړاندې کړي.
د ننګرهار پوهنتون عمومي رئیس شیخ انعام الله مدني په خپلو خبرو کې د یادو ماسترانو په فراغت خوښي وښوده، د مملکت په اقتصادي خپلواکۍ کې یې د هغوی پر رول خبرې وکړې او سپارښتنه یې ورته وکړه، چې خپله ترلاسه کړې پوهه او تجربه په عمل کې ثابته، له نورو سره شریکه او په اخلاص سره د خلکو خدمت ترسره کړي.
د ننګرهار ولایت مقام سلاکار مولوي سمیع الله سمون او د اقتصاد پوهنځي استاد پوهاند حمدالله نظامي په خپلو ویناوو کې فارغان نورو لوړو مسلکي زده کړو ته وهڅول او یاد ځوانان یې د هېواد مهم قشر یاد کړ، چې باید خپل راتلونکي مسؤلیتونه په سمه توګه ترسره کړي.
د غونډې په پای کې د پوهنځي رهبرۍ، استادانو او راغلو مېلمنو د پوهنتون مشرتابه ته د اعزاز لونګۍ په سر کړه او فارغانو ته سندونه ووېشل شول.
سرچینه: د نشراتو او عامه اړیکو امریت
