د ننګرهار پوهنتون د بېلابېلو پوهنځیو (۲۶۵) تنه محصلین د کمپیوټر کورس څخه فارغ شول.
د مسؤلینو په وینا، یادو محصلینو ته یې د څلورو میاشتو کمپیوټري زده کړو وروسته د عملي او تحریري ازموینو په پایله کې د فراغت سندونه ورکړل.
یاده برنامه د لوړو زده کړو محترم وزارت د هدایت په اساس او د محصلانو خدمتونو او همغږۍ امریت په هڅو ترتیب شوې وه، چې په ترڅ کې یې د مجربو استادانو له خوا محصلینو ته د کمپیوټر (MOS) برنامې تدریس او روزنه ورکړل شوه.
د کورس څخه فارغو محصلینو ته د پوهنتون په جامع مسجد کې فراغت غونډه جوړه شوې وه چې پر مهال یې د ننګرهار پوهنتون عمومي رئیس شیخ انعام الله مدني، د لوړو زده کړو وزارت د محصلانو خدمتونو او همغږۍ رئیس مولوي فضل کریم صدیقي، د ننګرهار پوهنتون د محصلانو چارو مرستیال مولوي عبیدالله عابد او نورو مسؤلینو له خوا فارغو محصلینو ته سندونه او جوایز ورکړل شول.
سرچینه: د اطلاعاتو، نشراتو او عامه اړیکو امریت
