ننګرهار پوهنتون کې د کرکټ سیالۍ د ساینس پوهنځي لوبډلې په اتلولۍ پای ته ورسېدې.
د کرکټ سياليو یاد لس اوریزه ټورنمنټ، چې د ننګرهار پوهنتون د سپورت او بدني روزنې امريت له خوا یوه میاشت وړاندې پیل شوی و، د دې پوهنتون د اړوندو پوهنځيو او پوهنتون فامیلیو ۱۵ لوبډلو په کې ګډون کړی و.
د یادو سیالیو په وروستي پړاو (فاینل) کې ساینس پوهنځي لوبډلې د حقوقو او سیاسي علومو پوهنځي لوبډلې ته په ماتې ورکولو سره د ټورنمنټ لومړی مقام او د اتلولۍ جام وګاټه.
د کرکټ سیالیو دې ټورنمنټ د پای په مراسمو کې د ننګرهار پوهنتون د محصلانو چارو مرستیال مولوي عبیدالله عابد سربېره د بېلابېلو پوهنځیو رئیسانو، استادانو، فرهنګي کمېټې غړو، د سپورت او بدني روزنې امریت مسؤلینو او ګڼو محصلینو برخه لرله.
د ننګرهار پوهنتون د سپورت او بدني روزنې آمر قاري نصیر احمد عباس وویل، سپورت او ورزشي فعالیتونه د محصلینو د بدني او فکري ځواک پیاوړتیا لپاره ډېر مهم دي او راتلونکي کې به هم محصلینو ته د مختلفو سیالیو ټورنمنټونه دایر کړي.
د مراسمو په پای کې د مسؤلینو او راغلو مېملنو له خوا د ګټونکې لوبډلې لوبغاړو ته کپونه، مډالونه او سیالیو تنظیموونکو ته ستاینلیکونه ورکړل شول.
سرچینه : د اطلاعاتو، نشراتو او عامه اړیکو امریت
