د ننګرهار پوهنتون منسوبینو ته د ناسمو رواجونو او عقودو په هکله د اسلامي امارت د مشرتابه (حفظه الله) د فرمانونو د تشریح یو ورځنی سيمينار دایر شو.
یاد سيمينار د دې پوهنتون د رهبرۍ په لارښوونه د دعوت او ارشاد امریت په نوښت د روانې محرم الحرام میاشتې په ۲۰ مه نېټه د پوهنتون په جامع مسجد کې دایر شو، چې د پوهنتون رئیس، مرستیالانو، پوهنځیو مسؤلینو، استادانو، اداري او خدماتي کارکوونکو په کې ګډون کړی و.
د سيمینار پرانیستې وینا پر مهال د ننګرهار پوهنتون د دعوت او ارشاد آمر مولوي خلیل الله معصوم د ټولو امارتي ادارو په ځانګړي ډول ننګرهار پوهنتون منسوبینو لپاره د نظام پالیسیو او فرامینو باندې پوهېدل او هغه پلي کول لازمي وبلل او زیاته یې کړه، چې د ناوړه دودونو او عقودو اړوند د توشیح شويو فرمانونو په اړه عامه پوهاوی، تبلیغ ترسره کول او د کارکوونکو روزنه یې اساسي دنده ده.
د ننګرهار پوهنتون رئیس شیخ انعام الله مدني وویل، د ناسمو دودونو او عقودو په اړه فرامین د شریعت مطهره احکام له مخې لیکل شوي، چې سرغړونه ترې د الله تعالی د ناراضه کېدو سبب ګرځي او ټولنه بدبختۍ لور ته بیايي.
نوموړي د دایر شوي سيمینار په مهم والي او اړتیا خبرې وکړې او ګډونوالو ته یې د فرمانونو کامل تطبیق او امیر اطاعت سپارښتنه وکړه.
د ختیځ زون امارتي او خصوصي پوهنتونونو لپاره د لوړو زده کړو وزارت د دعوت او ارشاد ریاست استازي او د ننګرهار پوهنتون محصلانو چارو مرستیال شیخ شاکرالله وحدت هغه فرامین چې په دې وروستیو کې د اسلامي امارت د مشرتابه لخوا په ټولنه کې د ناسمو او غیر اسلامي دودونو او عقودو په هکله توشیح او نافذ شوي وو، ماده په ماده تشریح او ارایه کړل.
د نوموړي په وینا، دا فرمانونه چې د اسلام مبارک دین د احکامو په رڼا کې ترتیب شوي دي، موخه ترې په ټولنه کې د هغو غیر اسلامي، فاسدو او خرافاتي رسوماتو له منځه وړل دي، کوم چې د اسلامي احکامو د ترویج مخه نیسي.
ښاغلي وحدت همدارنګه سپارښتنه وکړه، چې په ديني ارزښتونو او عدالت د یوې ولاړې ټولنې جوړېدو لپاره د یادو فرامینو تطبیق خپل مسؤلیت وګڼي او د ناسمو دودونو لمنځه وړلو لپاره فردي او اجتماعي هڅې وکړي.
سيمینار د ژبو او ادبیاتو پوهنځي رئیس پوهنیار حافظ سید محمد قاسم هاشمي په دعا سره پای ته ورسېده.
