د ننګرهار پوهنتون رهبرۍ د بېلابېلو پوهنځیو د جدیدالشمول محصلینو په ښه راغلاست غونډو کې ګډون وکړ.
د ننګرهار پوهنتون د علمي چارو او محصلانو چارو مرستیالانو د شرعیاتو، ښوونې او روزنې او انجنیري پوهنځیو د جدیدالشمول محصلینو په ښه راغلاست غونډو کې ګډون وکړ او د یادو پوهنځیو نویو محصلینو ته یې د هرکلي ویلو تر څنګ لازمې لارښوونې او سپارښتنې وکړې.
د ننګرهار پوهنتون د علمي چارو مرستیال پوهندوی مولوي احسان الله ناصح او د محصلانو چارو مرستیال پوهنیار حافظ سید محمد قاسم هاشمي په یادو غونډو کې د خپلو ویناوو پر مهال نوي راغلي محصلین خپلو مسؤلیتونو ته ځیر کړل او د پوهنتون له امکاناتو او شتمنیو څخه سالمې استفادې، قوانینو رعایت او غوره اخلاقو مظاهرې اړوند یې ورته سپارښتنې وکړې.
نوموړو یاد محصلین وهڅول چې خپلو علمي موخو ته د رسېدو لپاره د ننګونو پر وړاندې مقابله وکړي، وخت بې ځایه تېر نه کړي او ټولنه کې د علمي کادرونو او ګټورو اشخاصو په حیث ځانونه مطرح کړي.
د پوهنتون مرستیالانو له یادو محصلینو سره ژمنه وکړه، چې د هغوی د ظرفیت لوړونې لپاره به بېلابېل علمي او تحصیلي فرصتونه او برنامې جوړې کړي.
د غونډو پر مهال د یادو پوهنځیو له لوري خپلو تازه راغلیو محصلینو ته د پوهنتون او پوهنځیو پېژندنې، چاپېریال سره د بلدتیا او تحصیلي بهیر په اړه معلوماتي پرېزنټېشنونه وړاندې شول.
