ننګرهار پوهنتون کې د ستراتېژیک پلان، احصایې او راپورونو ترتیبولو په اړه یو ورځنی ورکشاپ ترسره شو.

nu_admin
چهارشنبه ۱۴۰۱/۴/۱ - ۱۰:۴۲
image

 

یاد ورکشاپ د لوړو زده کړو وزارت د پلان، پالیسۍ او تقنین ریاست په نوښت د غبرګولي په ۳۰مه نېټه د دې پوهنتون د غونډو په تالار (ادیتوریم) کې جوړ شو، چې د ننګرهار پوهنتون سربېره د ختیزو ولایتونو د دولتي او خصوصي پوهنتونونو او لوړو زده کړو موسسو ۲۵ تنو مسؤلینو او استازو په کې برخه لرله.

د ننګرهار پوهنتون رئيس پوهاند دوکتور خلیل احمد بهسودوال د ورکشاپ د پرانیستې وینا پر مهال د تحصیلي موسساتو د پرمختګ او انکشاف لپاره د معیاري پلانونو لرلو په اړتیا او ارزښت خبرې وکړې او د یاد ورکشاپ جوړېدل یې د دې موخې د ترلاسه کولو لپاره اړین او ارزښتمن وباله.

پوهاند بهسودوال د لوړو زده کړو وزارت رهبرۍ او د پلان، پالیسۍ او تقنین ریاست د مسؤلینو مننه وکړه، چې د هېواد د تحصیلي بنسټونو د معیاري کېدو او ظرفیت لوړونې لپاره په پوره ژمنتیا کار کوي او ددې لړۍ د دوام غوښتنه یې وکړه.

د لوړو زده کړو وزارت د پلان، پالیسۍ او تقنین رئیس مفتي رضوان الله منیب د ورکشاپ د موخو او موضوعاتو په اړه ګډونوالو مسؤلینو او استادانو ته معلومات ورکړل او زیاته یې کړه، چې د دې ورکشاپ له جوړېدو یې موخه د تحصیلي بنسټونو د پلانونو او راپورونو معیاري کېدل او یو شان والی دی.

نوموړي د ننګرهار پوهنتون د مشرتابه او مسؤلینو مننه وکړه، چې په مرسته او همکارۍ یې د یاد ورکشاپ دایرېدو ته زمینه برابره شوه.

د ختیزو ولایتونو د دولتي او خصوصي پوهنتونونو لپاره د لوړو زده کړو وزارت فوق العاده استازی او د ننګرهار پوهنتون د اداري او مالي چارو مرستیال پوهنیار قاضي خالد صداقت، د علمي چارو مرستیال پوهنمل احسان الله ناصح او د لوړو زده کړو وزارت د پلانونو ترتیبولو، توحیدولو او پلي کولو آمر محمد داود ځلاند نور ویناوال وو، چې ټولو د یاد ورکشاپ په دایرېدو خوښي وښوده او برخوالو ته یې سپارښتنه وکړه، چې ترلاسه شوي مهارتونه د خپلو اړوندو پوهنتونونو د مسؤلو چارواکو او کمېټو سره شریک کړي.

د ګډونوالو په استازیتوب د روښان لوړو زده کړو موسسې علمي مرستیال توریالي همت او د لغمان پوهنتون استازي واجدالرحمن عادل د لوړو زده کړو وزارت د پلان، پالیسۍ او تقنین ریاست له مسؤلینو مننه وکړه او د ترسره شوي ورکشاپ مواد یې نوي او د پوهنتونونو لپاره مهم وبلل.

د یادونې وړ ده، چې د ورکشاپ د روزنې چارې د ستراتېژیک پلان توحیدولو کارپوه عبدالله باباخاني او د تحصیلي بنسټونو د احصایې کارپوه وحیدالله شمسي له خوا پر مخ وړل کېدې.

تازه خبرونه

شنبه ۱۴۰۵/۸/۲ - ۱۳:۱
Background image

د ننګرهار پوهنتون محصلینو ته د مشاورې مهارتونو او رواني روغتیا په اړه معلوماتي سیمینار وړاندې شو.

یاد سيمینار چې د دې پوهنتون د محصلانو خدمتونو او همغږۍ امریت په هڅو د ښوونې او روزنې پوهنځي د ارواپوهنې او پیداګوژي څانګې دوو تنو استادانو له خوا ترسره شو، پر مهال یې سلګونو تنو محصلینو. . .

چهارشنبه ۱۴۰۵/۷/۲۹ - ۱۱:۴۵
Background image

د ننګرهار پوهنتون کارکوونکو ته اداري فساد سره د مبارزې په اړه معلوماتي سیمینار وړاندې شو.

د ننګرهار پوهنتون کارکوونکو چارو امریت اړوند وړتیا لوړونې عمومي مدیریت په نوښت د اداري فساد مخنیوي، ورځینو چارو لا روڼتیا او د یوې سالمې، ځواب ‌ویونکې او شفافې اداري فضا تأمین په موخه د. . .

چهارشنبه ۱۴۰۵/۷/۲۹ - ۱۱:۴۲
Background image

د ننګرهار پوهنتون محصلینو ته د سلام اچولو د اهمیت او فضیلتونو په اړه اصلاحي سیمینار وړاندې شو.

د ننګرهار پوهنتون دعوت او ارشاد امریت له خوا د دې پوهنتون لیلیه محصلینو ته په اسلام مبارک دین کې د سلام اچولو د اهمیت، فضیلتونو او ټولنیزو ګټو په اړه اصلاحي او معلوماتي سیمینار وړاندې. . .

BACK TO NEWS

User account menu