د ننګرهار پوهنتون انجنيري پوهنځي ستراتېژيک پلان

سريزه

انجنيري پوهنځى په ۱۳۵۷ ل کال کې تاسيس شوی دی. هغه مهال يې د صنعتي رهايشـي ودانيو جوړونې، اوبو رسولو او کاناليزسيون او تهويي او تسخين څانګې درلودلې. په نوموړو څانګو کې يې زيات شمېر کادرونه ټولنې ته د خدمت په موخه وړاندې کړي دي. په ۱۳۷۱ ل کال کې پورته درې څانګې د سيول په نامه يوه کې مدغمې شوې. انجينري پوهنځي د لا پرمختګ لپاره د امريکا متحده ايالاتو د سنتياګو له پوهنتون سره په ۲۰۰۸ز کال کې د همکارۍ يو تړون لاسليک کړ، چې په هغه کې د پوهنځي درسي کريکولم جوړول، استادانو ته د ماسټرۍ په کچه د لوړو‌زده‌کړو زمينه برابرول، لابراتورارونو د سامان تهيه او نصبول او کتابونه تهيه کول شامل وو. د نوموړي قرارداد له مخې شپږ تنه د علمي کادر غړي په سيول انجينري برخه کې د ماسټرۍ په موخه د امريکا متحده ايالاتو او پولينډ هېواد ته ولېږل شول او په برياليتوب سره يې بېرته خپل هېواد ته را ستانه شول. د سيول څانګې لپاره درسي کريکولم جوړ شو، کتابونه او ليکچرنوټونه برابر او تر يوه بريده د کانکريټو، ساختماني موادو، قير، کېميا لابرتوار وسايل او سامان الات برابر او نصب شول.  

په تیرو کالونو کې د پوهنځي د انکشافي او ستراتیژیک پلان له مخې د اوبو د زېرمو او چاپېريال ساتنې او همدارنګه د مهندسۍ څانګې ایجاد شوې. 

لرلید او د دندې ټاکنه

الف . لرلید Vision

د انجنیري پوهنځی په راتلونکې کې هیله لري چې د افغانستان د بیا رغونې او ودې لپاره او هم د هېواد اړتیاوو ته په کتو د انجینري علم په برخه کې  په مختلفو څانګو کې  محصلین وروزي او په اکاډمیکه سطحه د سیمې او نړۍ وړ ضرورتونو ته ځواب ووايي.

ب . د دندې ټاکنه Mission

د انجنیري پوهنځی د ننګرهار پوهنتون د یو پوهنځي په توګه دې ته ژمن دی، چې د هېواد د بیارغونې او انکشاف لپاره د انجنیري په بېلابېلو څانګو کې په علمي لوړه کچه کادرونه وروزي او ټولنې، سیمي او نړۍ ته په دولتي او خصوصي سکتورونو کې د خدمت لپاره يې وړاندې کړي. همدا رنګه د پوهنځي د شته ستونزو د حل او نويو پرمختګونو ته څېړنې ترسره کړي او د ښکلي چاپېريال په برابرولو کې خپله ونډه  واخلي.

SWOT Analysis

د ستراتیژیک پلان مقصد  Goal of Strategic Plan

د انجنیري پوهنځي د ستراتیژیک پلان مقصد د پوهنځي علمي او فزیکي بیا رغونه او پرمختګ دی چې دې مقصد ته د رسیدلو لپاره د پوهنځي په داخل او پوهنتون د موجوده امکاناتو څخه موثره ګټه اخيستل دي.

د ستراتیژیک پلان موخې Objectives of Strategic Plan

په علمي او اکاډمیک ډګر کې پرمختګ

د معیاري درسي او اداري خونو لپاره د ودانۍ جوړول او یا پراختیا 

د اداري سیستم رغول او وده.

د جنسیت د انډول تأمینول (Gender equality)

د معلوماتي تکنالوژۍ د اسانتیاوو برابرول او رایجول

  د موخو د تر لاسه  کولو لپاره کړنلارې

په علمي او اکاډمیک ډګر کې پرمختګ.

د استادانو د شمېر او علمي کچې لوړول .

د ۲۰ تنو استادانو څخه ۴۰ تنو ته د استادانو د شمېر لوړول.

د محصلینو او استادانو ترمنځ د انډول راښکته کول.

د موجوده  ۱۰ تنه لیسانس استادانو ( ۴۰٪)  د ماسترۍ پروګرامونو لپاره بهر ته لېږل.

د موجوده ۸ تنه ماسترانو څخه (۳۰٪)  د دوکتورا پروګرامونو لپاره بهر ته لېږل.

د فیلوشپ، کنفرانسونو، ورکشاپونو او نورو اړونده ښوونیزو او څېړنیزو پروګرامونو لپاره استادانو ته په بهر او داخل کې زمینه برابرول.

استادانو ته د انګلیسي او کمپیوتر په برخه کې روزنه ورکول.

استادانو ته د علمي او څېړنیزو پروګرامونو د اسانتیاوو چمتو کول.

د څانګو تاسیسول

د برق او الکتروتخنیک څانګې تاسیسول

د میخانیک انجنیري  څانګې تاسیسول

د څېړنیزو مرکزونو ایجادول

د څېړنو لپاره د ځای او امکاناتو برابرول

د څېړنیزو فعالیتونو لپاره د بودیجې برابرول

د څېړنیزو پروګرامونو ترسره کولو لپاره له بهرنیو پوهنتونو سره د همکارۍ تړونونو لاسليکول او له هغوی سره یوځای کار کول.

د انجنیري پوهنځي ټول لابراتورونه  په بشپړه توګه تکمیلول او فعالول.

د تدریسي پروسې انکشاف او د معقول درسي نصاب ټاکل

له نړیوال نورمونو سره سم د یو واحد او معیاری نصاب رامنځ‌ته کول.

د تحصیلي نصاب د تطبیقولو لپاره د معیاري اسانتیاوو برابرول

د محصلینو فعالیت او سرته رسول شویو دندو ارزول.

د تیورۍ او عملي درسي بهیر ترمنځ د انډول ساتل

د درسي پروسې د ارزیابۍ لپاره د کاري کمیټې ټاکل

د محصلینو د جذب او ظرفیتونو لوړول

په هر کال کې د پوهنځیو د انکشاف او امکاناتو  په پام کې نیولو سره د محصلینو په جذب کې ۲۵٪ زیاتوالی.

د دولسمو ټولګیو د فارغو ښځینه زده‌کونکو د تشویقولو  له لارې انجنیري پوهنځي ته  د اناثو د جذبولو شمېرې  زیاتول.

د لیسانس او ماسترۍ پروګرامونو لپاره بهرنیو هېوادونو ته د محصلینو لېږل.

د علمي سیمینارونو، کنفرانسونو او ورکشاپونو ترسره کول.

د هېواد په داخل او بهر کې د علمي سفرونو برابرول.

په درسي بهیر کې  محصلینو ته زیاته ونډه ورکول.

د انټرنشیپ د پروګرامونو لپاره د اسانتیاوو برابرول.

د پوهنځي د کتابتون فعالول او د هغه لپاره د فني او مسلکي پرسونل ګمارل.

د «ساختماني ټکنالوژي» په نوم د انجنیري پوهنځي په چوکاټ کې د علمي مجلې تاسیسول.

   د نویو درسي، اداري او د لابراتوار خونو جوړول او په نویو وسایلو سمبالول

د ننګرهار پوهنتون د انجينري پوهنځی اوس‌مهال د درې فارغ ورکوونکې څانګې لري، چې د ۹۵۰ تنو په شاو خوا کې محصلین پکې په زده‌کړو بوخت دي. دغه پوهنځی چې یوه تدریسي ودانۍ چې ټولې ۹ تدریسي خونې او یو کانفرانسونو کوچنۍ تالار لري، خو نوموړې خونې د اوسني شمېر محصلینو د زده کړو لپاره بسنه نه کوي. د پوهنځي ادارې د پوهنتون ریاست ته وړاندیز کړی چې د انجنیري پوهنځي لپاره نوې ودانۍ په خپل پرمختیايي پلان کې ونیسي او یا هم همدغه تعمیر ته پراختیا ورکړي.

د اداري سیستم رغول او وده

زوړ اداري سیستم په عصري سیستم بدلول

اداري سیستم په کمپیوټري ټکنالوژۍ سمبالول

د کمپیوتر ټکنالوژۍ په اړه د اداري پرسونل روزل

د اداري پرسونل لپاره د بستونو د شمېر زیاتوالی

اکاډمیک استقلالیت تر لاسه کول

ترانسپورتي وسایطو تر لاسه کول

د جنسیت د انډول تأمینول

د نرینه او ښځینه محصلینو تر منځ د انډول ساتل

د ښځینه مکتبونو فارغانو هڅول چي په کانکور ازموینه کې برخه واخلي

د ښځینه محصلینو د  جذب او تشویق لپاره د ښځینه  استادانو ګمارل

د معلوماتي ټکنالوژۍ رایجول

له شته معلوماتي ټکنالوژۍ څخه اغېزمنه ګټه اخیستل

ویډیو کنفرانسونو لپاره د زمینې برابرول

د تدریس د چارو د ښه پر مخ بیولو لپاره د پراجکتورونو چمتو کول