د وترنري علومو پوهنځي نوى رئيس د نوموړي پوهنځي استاذانو او منسوبينو ته وروپېژندل شو

06 مارچ, 2018

 

د وترنري علومو پوهنځي نوى رئيس د نوموړي پوهنځي استاذانو او منسوبينو ته وروپېژندل شو
د ننګرهار پوهنتون د وترنري علومو پوهنځي استاد پوهنوال پيرمحمد ستانکزى د نوموړي پوهنځي د نوي رئيس په توګه له ټاکل کېدو وروسته نن ورځ رسماً د پوهنتون د رئيس پوهنوال ببرک مياخېل له خوا د نوموړي پوهنځي استاذانو او منسوبينو ته وروپېژندل شو.
په هغه غونډه کې له همدې امله د وترنري علومو په پوهنځي کې جوړه شوې وه، د ننګرهار پوهنتون د رئيس، علمي چارو، محصلانو چارو او د مالي او اداري چارو مرستيالانو سربېره پکې د بېلابېلو پوهنځيو رئيسانو، استاذانو او اداري کارکوونکو برخه لرله.
غونډه د ننګرهار پوهنتون رئيس پوهنوال ببرک مياخېل په پرانيستونکې وينا پيل شوه. نوموړي وويل د پوهنتون او لوړو زده کړو وزارت رهبرۍ اړينه وبلله، چې د وترنري پوهنځي د لاښه والي او مثبت بدلون لپاره ددې پوهنځي د علمي کادر غړى ښاغلى پوهنوال پيرمحمد ستانکزى د پوهنځي د نوي رئيس په توګه غوره کړي.
ښاغلي مياخېل چوکۍ او منصب امتياز نه، بلکې ستر مسووليت وباله او ښاغلي ستانکزي ته يې د نوي مسووليت د مبارکۍ ترڅنګ د هغې د ښه ترسراوي هيله څرګنده کړه.
د پوهنتون رئيس د وترنري علومو پوهنځي د تېر رئيس پوهندوى سيدضياءالحق بنوري د کړنو، خدمتونو او هلو ځلو ستاينه وکړه او نوموړي ته يې د لوى خداى ج له درباره د اجر غوښتنه وکړه. 
د غونډې په پاى کې د وترنري علومو پوهنځي نوي رئيس پوهنوال پيرمحمد ستانکزي خبرې وکړې او د پوهنتون د رياست او وزارت مقام له مشرتابه څخه يې مننه وکړه، چې په نوموړي ددې ستر مسووليت باور وکړ او ژمنه يې وکړه چې د پوهنځي د لاښه والي او معياري کېدو په موخه به نه ستړي کېدونکې هلې ځلې وکړي.