ننګرهار پوهنتون

ننګرهار پوهنتون، چې د هېواد په کچه دويم ستر پوهنيز او اکاډميک مرکز دى، د بنسټ ډبره يې پر (1342) لمريز کال د تلې په (17) د اعلحضرت محمدظاهر شاه د واکمنۍ پر مهال د پوهنې وزير ارواښاد علي احمد پوپل له خوا د جلال اباد ښار په شيشم باغ سيمه کې کېښودل شوه. پيل يې د طب له پوهنځي وشو، چې پنځو امريکايي او درېو افغان استادانو پکې (٤٨) تنو محصلانو ته تدريس کاوه، چې د وخت په تېرېدو پکې د انجنيري، کرنې، ښوونې او روزنې، ژبو او ادبياتو، اقتصاد، شرعياتو، حقوقو او سياسي علومو، وترنري علومو، ساينس، کمپيوټر ساينس، ژورنالېزم او عامه ادارې او پالېسۍ پوهنځي رامنځته شول. اوسمهال ننګرهار پوهنتون (13) پوهنځي لري، چې په (73) څانګو کې يې (14004) تنه محصلان په زده کړو بوخت او د (467) تنو استادانو له خوا يې د تدريس چارې پرمخ ځي.

د ننګرهار پوهنتون له علمي بهير څخه (54) کاله تېرېږي، چې ددې نيمې پېړۍ هلو- ځلو ستره لاسته راوړنه يې په بېلابېلو څانګو او مسلکونو کې د (23005) تنو علمي کادرونو روزل او د خدمت په موخه ټولنې ته وړاندې کول دي.

اداري تشکيل

  • ننګرهار پوهنتون رياست
  • علمي چارو معاونيت
  • محصلانو چارو معاونيت
  • مالي او اداري چارو معاونيت

د ننګرهار پوهنتون رياست

د ننګرهار پوهنتون رياست مقام، چې د پوهنتون د ټولو چارو مسووليت او مشري په غاړه لري، اوسمهال يې رئيس پوهندوى ببرک مياخېل دى، چې د (1394) ل کال د وږي له نهمې نېټې څخه يې په دندې پيل کړى دى.

پوهنوال ببرک مياخېل د ننګرهار پوهنتون  رئيس

د رياست مقام په چوکاټ کې د دفتر آمريت، د تحريراتو، ارشيف، بورسونو او عرايضو مديريتونه فعاليت کوي.

د علمي چارو معاونيت

د علمي چارو معاونيت د پوهنتون د علمي او تدريسي چارو مسووليت پر غاړه لري، چې اوسمهال د پوهنتون د علمي چارو مرستيال پوهنوال ډاکتر ناصرخان کامه وال دى، چې د (1394) ل کال د زمري مياشتې له (12) نېټې راهيسې ياده دنده پرمخ وړي.

پوهنوال ډاکتر ناصرخان کاموال د علمي چارو مرستيال

د علمي چارو معاونيت په چوکاټ کې ديارلس ګوني پوهنځي، د استادانو چارو، علمي څېړنو او د کيفيت د تضمين آمريتونه خپل اکاډميک فعاليتونه پرمخ وړي.

ننګرهار پوهنتون (7٣) ديپارتمنتونه او (467) تنه استادان لري چې د تحصيلي درجې له مخې يې وېش په لاندې توګه دى:

د محصلانو چارو معاونيت

د محصلانو چارو معاونيت د پوهنتون په محصلانو پورې د ټولو اړوندو چارو مسووليت پر غاړه لري، چې اوسمهال د محصلانو چارو مرستيال پوهنمل نعيم جان سروري دى؛ نوموړى د (١٣٨٩) ل کال د کب له (٢٥) نېټې څخه ياده دنده پرمخ وړي.

پوهنيار نعيم جان سروري د محصلانو چارو مرستيال

د محصلانو چارو معاونيت په چوکاټ کې د محصلانو چارو، سپورت او بدني روزنې آمريتونه او نور اړوند مديريتونه فعاليت کوي.

ننګرهار پوهنتون په ديارلس ګونو پوهنځيو ليسانس(ورځې-شپې)، ماسترۍ او دوکتورا برنامو کې ټول (١٤004) تنه محصلين لري:

د اداري او مالي چارو معاونيت:

د اداري او مالي چارو معاونيت د پوهنتون د اداري او مالي چارو مسووليت پر غاړه لري، دمګړۍ ښاغلى پوهنيار مسعود مؤحد د پوهنتون د اداري او مالي چارو مرستيال دى. نوموړى د (١٣٩٤ل) کال د تلې مياشتې له (٢١) نېټې څخه ياده دنده پرمخ وړي.

پوهنيار مسعود مؤحد د اداري او مالي چارو مرستيال

د اداري او مالي چارو معاونيت په چوکاټ کې د بشري سرچينو، تهيه، تدارکات او خدماتو، مالي او حسابي چارو، اړيکو او عامه پوهاوي، کتابتون او معلوماتي ټيکنالوژۍ، کرنيز فارم، روغتيايي کلنيک او د پوهنتون تدريسي روغتون آمريتونه فعاليت کوي. د ننګرهار پوهنتون په اداري چوکاټ کې (٤٠٦) تنه په دنده بوخت دي، چې له دې ډلې (٢٢١) تنه مامورين او (١٨٥) تنه يې اجيران دي.

شپې پوهنځيو پروګرام

ننګرهار پوهنتون د دولسمو ټولګيو د هغو فارغانو لپاره، چې داخل خدمت دي او په رسمي وخت کې لوړو زده کړو ته لاس رسى نشي کولى، په لاندې پوهنځيو کې د شپې پوهنځيو برنامه لري:

  1. ښوونې او روزنې پوهنځى
  2. شرعياتو پوهنځى
  3. ژبو او ادبياتو پوهنځى
  4. حقوقو او سياسي علومو پوهنځى
  5. اقتصاد پوهنځى

چې په نوموړو پوهنځيو کې (2597) تنه محصلان په زده کړو بوخت دي، چې له دې ډلې (177) تنه نجونې دي.

ماسترۍ او دوکتورا پروګرامونه

ننګرهار پوهنتون کې د ماسترۍ پروګرام د لومړي ځل لپاره په (١٣٩١) لمريز کال کې د شرعياتو په پوهنځي کې پيل شو. اوس مهال د ماسترۍ پنځه پروګرامونه ددې پوهنتون په څلورو پوهنځيو کې فعال دي، چې په ترتيب سره يې لاندې راوړو:

  1. شرعياتو پوهنځى
  • فقهې او قانون څانګې ماسترۍ پروګرام
  • اسلامي تعليماتو څانګې ماسترۍ پروګرام

 

  1. حقوقو او سياسي علومو پوهنځى
  • قضاء او څارنوالۍ څانګې ماسترۍ پروګرام

 

  1. ژبو او ادبياتو پوهنځى
  • پښتو ژبې او ادب څانګې ماسترۍ پروګرام

٤. اقتصاد پوهنځى

  • BBA څانګې ماسترۍ پروګرام

د ماسترۍ دورې په پورته څلورو څانګو کې د ننګرهار او د هېواد د بېلابېلو پوهنتونونو د علمي کادرونو په ګډون (287) تنه په زده کړو بوخت دي او (230) تنه يې د شرعياتو، حقوقو او ادبياتو په برخه کې ماستران فارغ او ټولنې ته د چوپړ لپاره وړاندې کړي دي.

دوکتورا پروګرام

د هېواد په کچه د لومړي ځل لپاره د ننګرهار پوهنتون د شرعياتو په پوهنځي کې د دوکتورا پروګرام رامنځته شو، چې د نوموړي پروګرام پرانيسته د (1393ل) کال د وږي مياشتې په (6 مه) نېټه د هغه وخت د لوړو زده کړو وزير پوهاند دوکتور عبيدالله عبيد له خوا په ننګرهار پوهنتون کې وشوه. اوسمهال په ياد پروګرام کې د ننګرهار او د هېواد د بېلابېلو پوهنتونونو (21) تنه علمي کادرونه په زده کړو بوخت دي. 

رسنۍ

 ننګرهار پوهنتون له خپلو علمي فعاليتونو څخه د خلکو د پوهاوي لپاره يوه وېبپاڼه، يوه فيسبوک پاڼه، درې علمي مجلې او يو شمېر جريدي او اخبارونه لري، چې تفصيل يې لاندې راوړو:

ننګرهار پوهنتون وېبپاڼه

يوه انټرنېټي وېبپاڼه ده، چې د (www.nu.edu.af) پتې په لرلو سره پکې د ننګرهار پوهنتون په اړه معلومات، څېړنيزې ليکنې او د پوهنتون خبرونه او خبرتياوې خپرېږي.

ننګرهار پوهنتون فيسبوک پاڼه

د ټولنيزې شبکې (فيسبوک) پاڼه ده، چې د (ننګرهار پوهنتون- Nangarhar University) ادرس لرلو سره پکې د پوهنتون اړوند خبرونه او خبرتياوې خپرېږي.

پوهه علمي مجله

د ننګرهار پوهنتون مرکزي علمي او څېړنيزه خپرونه ده، چې په هرو درېو مياشتو کې يو ځل (٥٠٠) ټوکه چاپېږي، چې د پوهنتون د استادانو علمي او څېړنيز اثار خپروي.   

                                     

طبي پوهه علمي مجله

د ننګرهار پوهنتون طب پوهنځي علمي او څېړنيزه مهالنۍ خپرونه ده، چې د نوموړي پوهنځي د استادانو فرعي علمي اثار او څېړنې خپروي.          

حق علمي مجله

د ننګرهار پوهنتون د حقوقو او سياسي علومو پوهنځي علمي او حقوقي ژورنال دى، چې په هرو درېو مياشتو کې يوځل د پنځه سوو ټوکو په شمېر کې چاپېږي او د نوموړي پوهنځي د استادانو علمي اثار او ليکنې خپروي.

بېلابېلې خپرونې

په پورته راوړل شويو خپرونو سربېره د ننګرهار پوهنتون د يو شمېر پوهنځيو د محصلانو له خوا په بېلابېلو نومونو مجلې، جريدې او اخبارونه هم خپرېږي.

کتابتون

ننګرهار پوهنتون د ديارلس ګونو پوهنځيو پر کتابتونونو سربېره يو مرکزي کتابتون هم لري، چې د بېلابېلو مسلکونو (٤٤٠٠٠) ټوکه کتابونه پکې د محصلانو د مطالعې لپاره ايښودل شوي دي.

د  انګليسي ژبې، کمپيوټر او انټرنيټ مرکز

د (ELC) په نوم د ننګرهار پوهنتون د انګليسي ژبې، کمپيوټر زده کړې او د انټرنيټ مرکز دى، چې د پوهنتون ټولو پوهنځيو ته د نيټ د ورکړې ترڅنګ په پرلپسې توګه محصلانو ته د انګليسي ژبې او کمپيوټر د زده کړې کورسونه هم جوړوي. د نوموړي مرکز ترڅنګ يو شمېر پوهنځي ځانګړي انټرنيټ مرکزونه لري، چې محصلان او استادان ترې په ښه توګه ګټه اخلي.

ليليه

ننګرهار پوهنتون د ليرې پرتو سيمو او نورو ولايتونو محصلانو لپاره، چې په شرايطو برابر وي، د ليليې اسانتيا هم لري، چې همدا اوس ددې پوهنتون په مرکزي، طب، ښوونې او روزنې او کمپيوټر ساينس پوهنځيو په ليليو کې (٢٥٠٠) تنه ليليه دي او (6800) تنو ته بدل اعاشه ورکول کېږي.

 

 

اړيکې:

برېښليک:       Info@nu.edu.af 

وېبپاڼه:            www.nu.edu.af

فيسبوک: (ننګرهار پوهنتون- Nangarhar University)

ترتيب او ټولونه: د اړيکو او عامه پوهاوي آمريت

پاى