د ننګرهار پوهنتون د محصلانو چارو مرستیال د ننګرهار ارشاد، حج او اوقافو رئیس سره غونډه وکړه.
یاده غونډه چې د ننګرهار ارشاد، حج او اوقافو په ریاست کې ترسره شوه، پر مهال یې د دواړو ادارو تر منځ په علمي او دیني برخو کې د همکاریو په پیاوړتیا خبرې وشوې.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي د خپلې وینا پر مهال د دیني ارزښتونو د خپرولو او د ټولنې علمي پرمختګ په برخه کې د دواړو ادارو ترمنځ د پیاوړې همکارۍ او ګډ کار په اړتیا خبرې وکړې او راتلونکي کې یې د متقابلو همکاریو په ترسراوي هوکړه وکړه.
ښاغلي هاشمي ډاډ ورکړ، چې د پوهنتون محصلین به د ارشاد، حج او اوقافو ریاست د فعالیتونو په تنظیم، علمي برنامو، ورکشاپونو او ديني سیمینارونو کې د خپلې پوهې پراختیا او همکارۍ په نیت برخه واخلي.
د ننګرهار ولایت د ارشاد، حج او اوقافو رئیس مفتي عبدالستار سیرت په خپلو خبرو کې د ننګرهار پوهنتون روان اکاډمیک او تحصیلي خدمتونه وستایل او د خپل ریاست اړوند بېلابېلو برخو کې یې د مرستې او همکارۍ غوښتنه وکړه.
نوموړي راتلونکي کې د ننګرهار پوهنتون او ارشاد حج او اوقافو ریاست تر منځ د کاملې همکارۍ او همغږۍ رامنځ کېدو ډاډ ورکړ.
